Huseynê Farê – Fersende Begê

Axawo li min li min li min
Xwedayê mim pê dizane
Ji berê ve em mehkûm û firarê
Destê Roma teres in
Xalisê dinê xwe ne
Canfedayê mala şêx in

Axawo li min ax li min li min
Lo lo mîro şerekî li me çê dibû
Li hewşa serayê
Qalekî giran li me daketiye
Mij û dumana şewitî
Dîsa li hember e

(Di vê derê de neliheviyek heye. Di bandê wî yê dawî de ev awa jî heye.:)

Axawo li min ax li min li min
Heyla lo mîro min go
Şereka li me çê dibû li hewşa Sarayê
Qalekî giran li me daketiye
Li kavilê Murtumana şewitî
Vê sibê dîsa li sersa vê kaniyê
Lê dayê rebenê min ê vê sibê
Bal û dêhna xwe berdayê
Ta ji êvarî Xwedê da
Li ser kozik û meterisê Silêmanê Ehmed
Keremê qolaxa bi tevî
Xalisê Ûsuv Begê
Xweş tê dengê mîratê topan û mitrelosa
Cebilxanan û gawursustema
Dibû hwurmîn û nalîn û zarînê gulê topê
Ji êvar de xweş tê
Sewta bêxwedîka vê borînê

Besnayê bi sê denga dikir gazî
Digo de lo lo Fersende
Te digo wezê Fersende me
Ez berxê Mala Emer im
Roja şer biqewime
Ez siwarê Eznawir im
Na na wele
Çar hev papaxreşî Qecera
Ji êvarî Xwedê da
Devê mîratê wan malikan û gawursustema
Kirine kozik û meterisê Silêmanê Ehmed
Keremê Qolaxa bi tevî
Xalisê Ûsuv Begê
Bi destê zorê
Bi devê mîratê gawursustema
Ji milê van xweşmêra vekirine
Nîşan û rutbê Hamidiyê

Heyla mîrê min
Hey de hûn ê lê xin
Le bavê bavê mino hûn ê lê xin
Rabin kekê mino hûn ê lê xin
Hûn ê destê xwe bavêjin
Qayişê mîratê gawursustema
Qondaxê modalîka çartiliya li erdê xin
Mêra bikujin navê revê pêxin
Mûma bitefînin şemdana vêxin
Xwedayê min pê dizane
Ji berê paş de
Mezin û piçûkê me
Rabûne ranebûne
Em ê mahkûm û firarê Roma teres in
Xalisê dînê xwe ne
Canfîdayê mala Şêx in

Axawo hey li min li min
Sed carî li min
Heyla lo mîro min digo
Şereka li me çê dibû
Li hewşa Sarayê
Qalekî giran li me daketiye
Li kavilê Murtumana şewitî
Vê sibê dayê dîsa li hember e
Na na wele min ê vê sibê
Bal û dêhna xwe berdayê
Ta ji êvarî Xwedê da
Li ser kozik û meterisê Silêmanê Ehmed
Keremê Qolaxa bi tevî
Xalisê Ûsuv Begê
Xweş tê dengê mîratê topan û mitrelosa
Cebilxanan û gawursustema
Ji êvar de mij û duman e vê sibê
Qelebalix e dîsa yeqîn şer e

Fersende bi sê denga dikir gazî
Digo de lê lê Besnayê
Te digo wez ê Besna me
Ez qîza Eliyê Ecem im
Roja şer biqewime
Qîza heft bavê çê me
Dergûşa ser destê te zarûkê kurîn e
Tu baz de şer giran e
Tu yê vê sibê bigre
Derkeve ji navê here

Besnayê bi sê denga dikir gazî
Digo de lo lo Fersende
Wele wez ê Besna me
Ez qîza Eliyê Ecem im
Roja şer biqewime
Qîza heft bavê çê me
Dergûşa ser destê min zarûkê kurîn e
Îro dikim bi qurbana
Nav û namûsê Mala Emer e
Ez ê çi bikim
Bavê Kazim Keremê Qolaxa
Sond xwariye bi sondê temam
Sondê telaqê jinberadanê
Heta serê şahê Îranê jê neke
Ji vî şerê hanê
Nayê tu cara venagere

Hey de hûnê lê xin
Bavê bavê mino hûn ê lê xin
Rabin kekê mino hûn ê lê xin
Hûn ê destê xwe bavêjin
Qayişê mîratê gawursustema
Qondaxê modalîka çartiliya li erdê xin
Mêra bikujin navê revê pêxin
Mûma bitefînin şemdana pêxin
Xweadyê pê dizane
Ji berê û pêş da
Piçûk û mezinê me
Rabûne ranebûne
Em ê mahkûm û firarê Roma teres in
Xalisê dînê xwe ne
Canfîdayê mala şêx in

De na na wele wez ê dîsa
Weyla axawo şerekî li me çê dibû
Li girikê jêrîn û jorîn
Wele li ser somerê
Hafa her du ava
Li xopana Qizilçubûxê me bidarebî ne
Min dî qiflekî suwarê mala Xelîl
Wele vê sibê suwar ketine hatê
Ji xwe re ge dixarîne ge dilezînin
Bila kula Xwedê bi sê kula
Tekeve derê Reşîdê lawê Serhed
Derbekî bila li bejna bavê Silhedîn dabû
Wele ji êvar de
Bi du guleyen birîndar e
Halê wî tu nîne
Min bala xwe dayê
Li erefa meydanê sekiniye
Yadoyê min Dimilî suwarê Nîgarê
Kilê çavê Telîyê
Tevî şahê xortan
Teyrê ecelê Sadûn e
Lawo çavhêşîn e

(Dengbêj Huseynê Farê, vê kilamê bi du awayan distrê ( notê berhevkêr). Lêbelê mijara kilamê cihê dibe. Guman heye ku dengbêjê me, kilama Yadoyê Dimilî û Fersende li hev û du xistibe.)

Parve Bike

Bersivekê Binivîsêne

Your email address will not be published. Required fields are marked *

This site uses Akismet to reduce spam. Learn how your comment data is processed.