Ferhad Merde – Ez Ji Te Hez Dikim

Ji te hez dikim û hez dikim û hez dikim
Û nexweziya wê cara ku min gotî ji te hez dikim
Ez hej te dikim tu cîran bî û di navbera min û te de ne sînor û ne dîwar bî
Tenê şevek heba û şev jî ji heyv û stêrkan re negotiba çawa ji te hez dikim
Ez hej te dikim tu her bima zarok, daku di lîstok û yariyên te de min xwe dîtiba zarok
Wê gavê tukes lome ji min nedikir ku min ji te re gotiba ji te hez dikim
Ez hej te dikim, ji te bêhtir û ji deriya te firehtir û ji gerdena te xweşiktir
Û ji bejna te ziravtir, ciwantir, birûmettir
Nexerîb e ku xweda te dabe ku tu ji min ra bibe qeder
Û nexerîb e ku Xweda min jî dabe ji boyî ku hej te bikim
Ez hej te dikim ku li ser refa eşqa min tu mamoste bî
Û ez şagirtekî tembel bim, lawaz bim, neguhdar bim
Ji boyî her gavê, bê rawestan, te min ho kiriba çawa ji te hez bikim
Ez hej te dikim ji te dûr bim û ji te bêxeber bim di bin konê xurbetê de
Da di her bîranînekî xwe de binivîsînim ji te hez dikim
Lê kengî gava ku xerîbî te bi min şirîn bike û ez bîriya te bikim, wê gavê ez hej te bikim
Ez hej te dikim lê ne li vir, li cîyekî din, di wî welatê ku tu tê de biba al
Û di bin sîya ala te de sond bixwim bi wî axa te û bi roka te û bi çiyayê te û bi çem û rûbar û kaniyên te
Min divê xewnan birêsînim bi tewn û xeyalên te
Û çîroka min bibe nivşek ji çîroka te
Wek te, çawa tu bikişî, çawa tu bimeşî, çawa tu di destana evîndaran de bibe sembol
Ez hez dikim tu roj bî û ez gulberoj bim, mêjdarê bêhna tîrêjên te bim
Wek derwêşek di eşqa te de xelwet bibim, kûr bibim, bibim sofî, cinetê bi çavê xwe bibînim
Ez bibînim ku tu têde bûye horî
Deriyê emrê min tim wekirî ne di hizûra dil de
Kengê tu derbaz be, bêminet be, derî nexe were
Ez hez dikim leşkerê hestên min, di nav leşkerên hestên te de bi artêş bin
Xwe bi rext û çek bikin ji hêza awirên te
Ger emrê min têra hezkirina te bike, ez ê te ji xwe re bikim rêbera şoreşa evîna xwe
Na ku ez mirim, qe ne tu jî min bike şehîdê eşqa xwe
Ez hez dikim, navê te, rengê te, delaliya te
Bimeşe di nav pirtûk û destanan û xwe weşêre di nav dîroka borî û ya bê
Roj bi roj, meh bi meh,
çend sal in ez xwe fêr dikim te ji xwe re bikim dijmin
Lê ka ew dilê ku qêmîş bike ji te re nebêje ji te hez dikim
Ku tu zalim be jî min nexem e, dagîrkeriya zilma te jî min neçar dike ku ji te re bêjim ji te hez dikim
Ku ez bêjim ez hej te nakim, derew dikim
Û li ser te ez ne dîn û har im, derew dikim
Û ji dîtina te ez poşman im, derew dikim, derew dikim, derew dikim
Ez derew jî bikim, lê dil derew nake, ji te hez dikim, hez dikim, hez dikim.

Parve Bike

Bersivekê Binivîsêne

Your email address will not be published. Required fields are marked *

This site uses Akismet to reduce spam. Learn how your comment data is processed.